By Table of Contents
Haveli Se Bhaagne Ki Aakhri Koshish, Purani Haveli Ka Shraap part – 3
Radha Ki Aatma Ka Gussa
Andhera poori haveli me phail chuka tha।
Arjun ka dil itni tez dhadak raha tha ki use apni saanse tak sunai de rahi thi।
Uske saamne Radha ki aatma khadi thi।
Uski laal aankhen andhere me chamak rahi thi aur payal ki awaaz poori haveli me goonj rahi thi।
“Chan… chan… chan…”
Radha dheere-dheere Arjun ki taraf badhne lagi।
“Tum yahan se nahi ja sakte…” usne dheemi aur thandi awaaz me kaha।
Arjun darr ke maare peeche hatne laga।
“Main ne kuch nahi kiya… mujhe jaane do…” Arjun ne ghabra kar kaha।
Radha ki aankhon me achanak gussa bhar gaya।
“Sab yahi kehte hain… lekin kisi ne mujhe bachaya nahi tha…”
Haveli Ka Darawana Hall
Arjun achanak mudkar main hall ki taraf bhaag pada।
Haveli ka hall bahut bada tha।
Diwaron par purani tasveeren lagi thi aur zameen par moti dhool jam chuki thi।
Jaise hi Arjun bhaag raha tha, achanak sabhi tasveeren hilne lagi।
Ek tasveer zameen par gir kar toot gayi।
Arjun ne dekha ki us tasveer me Thakur Veer Singh ka chehra tha।
Tabhi achanak haveli me tez hawa chalne lagi।
Darwaze zor-zor se “dhadam… dhadam…” ki awaaz ke saath band hone lage।
Radha ki hansi phir se gunj uthi।
“Hahaha…”
Purana Mandir
Arjun bhaagte-bhaagte haveli ke peeche wale hissa me pahunch gaya।
Wahan ek chhota sa purana mandir tha।
Mandir bahut purana tha lekin usme ek Shivling abhi bhi rakha hua tha।
Arjun ne turant mandir ke paas jaakar haath jod liye।
“Bhagwan… mujhe bachao…”
Tabhi achanak Radha ki aatma mandir ke bahar aa khadi hui।
Usne gusse se Arjun ki taraf dekha।
“Yeh mandir mujhe rok nahi sakta…” Radha ne gusse se kaha।
Lekin jaise hi wo mandir ke andar aane lagi, uske kadam ruk gaye।
Jaise koi invisible deewar ho।
Radha Ka Dard
Radha ki aankhon me gussa dheere-dheere dard me badalne laga।
“Main buri nahi thi…” Radha ne dheere se kaha।
Uski awaaz ab pehle se alag lag rahi thi।
“Main bas azaadi chahti thi…”
Arjun ne pehli baar Radha ke chehre par dard aur aansu dekhe।
Arjun ne himmat karke kaha,
“Tumhara badla poora ho chuka hai… ab tumhe shanti milni chahiye।”
Radha kuch pal ke liye chup ho gayi।
Haveli me ek ajeeb si khamoshi chha gayi।
Shraap Todne Ka Raaz
Tabhi mandir ke andar ek purani pothi (kitab) Arjun ko nazar aayi।
Usne use khola।
Usme likha tha:
“Aatma ko shanti tab milti hai jab uski kahani duniya ko pata chale aur uska sach sabke saamne aaye.”
Arjun ko samajh aa gaya।
Radha ka shraap isliye zinda tha kyunki uske saath hua anyaay kabhi kisi ne nahi suna
Arjun ne Radha ki taraf dekha
“Main tumhari kahani sabko bataunga… taaki duniya tumhara sach jaane,” Arjun ne kaha।
Radha ki laal aankhen dheere-dheere normal hone lagi
Aatma Ki Mukti
Radha dheere-dheere Arjun ke paas aayi
Is baar uski payal ki awaaz darawani nahi lag rahi thi
Usne halki si muskaan ke saath kaha
“Bahut saalon baad kisi ne meri baat suni hai…”
Radha ka chehra dheere-dheere roshni me badalne laga।
Uski aatma halka sa chamakne lagi।
“Ab shayad mujhe shanti mil jayegi…”
Itna kehkar Radha ki aatma dheere-dheere hawa me ghulne lagi
Aur kuch hi pal me wo poori tarah gayab ho gayi
Subah Ki Pehli Roshni
Thodi der baad haveli me khamoshi chha gayi।
Hawa ruk chuki thi
Darwaze khul gaye
Aur bahar se subah ki pehli roshni haveli ke andar aane lagi
Arjun dheere-dheere bahar nikla
Usne peeche mudkar haveli ko dekha
Ab wo pehle jitni darawani nahi lag rahi thi
Jaise kisi ne uska bohot purana bojh hata diya ho।
Gaon Walon Ko Sach Pata Chala
Arjun gaon wapas gaya aur sabko Radha ki kahani batai।
Gaon walon ne haveli ke paas Radha ki yaad me ek chhota sa mandir banwa diya।
Us din ke baad kisi ne bhi haveli me koi darawani ghatna nahi dekhi।
Log kehte hain ki Radha ki aatma ko aakhirkaar shanti mil gayi।
Lekin…
Lekin kuch gaon wale aaj bhi kehte hain…
Poornima ki raat kabhi-kabhi haveli ke paas se halki si payal ki awaaz sunai deti hai
“Chan… chan…”
Jaise koi bas yeh dekhne aata ho…
कि उसकी कहानी अब भी याद है या नहीं।
agar apko ye story achi lgi h toh please feedback jrur dein taki main aapke liye or b stories jldi la sku
Read more horror stories
Part-1 Purani Haveli Ka Shraap – Real Scary Horror story
Part-2 Purani Haveli Ka Shraap Part-2 – Real Scary Horror story
1 Comment